مارچ ٢٠٢٦
ایمان کی روشنی

غزہ کی سڑکوں پر دھول اور مٹی کی چادر بچھی ہوئی تھی۔
ہر طرف ٹوٹی دیواریں، بکھرے برتن اور جلتے مکانوں سے اُٹھتا ہوا دھواں۔
ہوا میں بارود کی بُو تھی، لیکن اس بُو کے درمیان کہیں نہ کہیں یوسف کے دل کی روشنی ابھی زندہ تھی۔
وہ اپنے ہاتھ میں ایک چھوٹی بوتل لیے چل رہا تھا۔
اس بوتل میں آدھا پانی بچا تھا، جو اس نے اپنے زیتون کے درخت کے لیے سنبھال رکھا تھا۔
راستہ لمبا نہیں تھا، مگر ہر موڑ پر تباہی کا ایک نیا منظر تھا۔
ایک گھر کی دیوار پر آیت لکھی تھی:

’’ولا تقنطوا من رحمة الله‘‘

(اللہ کی رحمت سے نا امید نہ ہو۔)
یوسف کے قدم رک گئے۔
اس نے آہستہ سے آیت پر ہاتھ پھیرا، جیسے لفظوں میں طاقت تلاش کر رہا ہو۔
پھر ایک کمزور سی آواز آئی:
’’پانی… کوئی ہے؟‘‘
یوسف چونکا۔ آواز ملبے کے پیچھے سے آ رہی تھی۔
وہ دوڑا۔ وہاں ایک لڑکا پڑا تھا، عمر میں شاید اسی کے برابر،
مگر چہرہ مٹی اور خون سے بھرا ہوا۔
ٹانگ کے نیچے پتھر کا ایک بڑا ٹکڑا دبا ہوا تھا۔
یوسف نے گھبرا کر کہا: ’’بھائی! تمھارا نام کیا ہے؟‘‘
لڑکے نے ہلکی سانس میں کہا: ’’سلمان…‘‘
یوسف نے فوراً پانی کی بوتل کھولی اور چند قطرے سلمان کے ہونٹوں پر ڈالے۔
’’ہمت کرو سلمان! میں تمھیں نکالوں گا، بس صبر کرو۔‘‘
اس نے ہاتھوں سے پتھر ہٹانے کی کوشش کی، مگر پتھر بہت بھاری تھا۔
اس کے ننھے ہاتھ لرزنے لگے۔
پھر اس نے آسمان کی طرف دیکھا اور دل میں کہا:
’’اے اللہ، یہ تیرا بندہ ہے، میں اکیلا کچھ نہیں کر سکتا، تو مدد فرما۔‘‘
اچانک قریب کے ایک دھماکے سے زمین ہل گئی
اور وہ پتھر ذرا سا سرک گیا۔
یوسف نے پوری طاقت سے سلمان کو کھینچا اور وہ دونوں زمین پر گرے،
مگر اب سلمان آزاد تھا۔
دونوں کچھ دیر خاموش بیٹھے رہے۔
یوسف نے پانی کی آخری بوند بھی سلمان کو دے دی۔
سلمان کی آنکھوں میں آنسو تھے،
’’یوسف… تم نے اپنی آخری بوند مجھے دے دی، اب خود کیا کرو گے؟‘‘
یوسف نے ہلکی مسکراہٹ سے کہا:
’’میرے پاس پانی نہیں، مگر اللہ ہے۔ وہ پیاس نہیں رہنے دیتا۔‘‘
دور سے مسجد کے منارے کی جگہ صرف ملبہ تھا،
مگر کسی کونے سے پھر بھی آواز آئی:
’’اللہ اکبر…‘‘
یوسف نے آنکھیں بند کر لیں۔
اس کے لبوں پر ہلکی مسکراہٹ تھی۔
’’دیکھو سلمان، جب سب کچھ مٹ بھی جائے،
تب بھی اللہ کی صدا باقی رہتی ہے۔
یہی ایمان کی روشنی ہے
جو کبھی بجھتی نہیں۔‘‘
سلمان نے آسمان کی طرف دیکھا،
جہاں دھوئیں کے بیچ سے
سورج کی ایک کرن زمین پر پڑ رہی تھی۔
یوسف نے کہا:
’’یہ روشنی شاید ہمارے لیے نہیں، مگر ہماری دعا کے لیے ضرور ہے۔‘‘
دونوں نے اپنے زیتون کے درخت کی طرف دیکھا۔
وہ اب بھی کھڑا تھا
اور اس کی سبز کونپل اب ذرا بڑھی، ذرا مضبوط ہو چکی تھی۔
یوسف نے آہستہ کہا،
یہی تو ایمان کی روشنی ہے
جو زخموں میں بھی سبز رہتی ہے۔

٭ ٭ ٭

Comments From Facebook

0 Comments

Submit a Comment

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے