شام کی نرم دھوپ آہستہ آہستہ زمین پر اپنا آخری لمس چھوڑ رہی تھی۔ آسمان پر سنہری، نارنجی، اور ہلکے جامنی رنگ بکھر رہے تھے، جیسے فطرت خود کسی مہمان کے استقبال کی تیاری میں مصروف ہو۔ انشراح اپنی نانی امی کے ساتھ صحن میں بیٹھی تھی۔ ایک پرانا سا جھولا، جس پر ہلکی سی ہوا کے جھونکے کے ساتھ سرسراہٹ کی آواز پیدا ہو رہی تھی، اور قریب ہی لگے گلِ مریم کے پھولوں کی خوشبوئیں سانسوں کو معطر کر رہی تھیں۔
انشراح نے نانی امی سے پوچھا:
’’نانی امی! رمضان آنے والا ہے، ہمیں کیا خاص تیاری کرنی چاہیے؟ کیا بازار سے خوب ساری چیزیں خریدیں یا گھر کو رنگ برنگی روشنیوں سے سجا دیں؟‘‘
نانی امی کے چہرے پر ایک گہری، پُرسکون مسکراہٹ ابھری۔ ان کی آنکھوں میں وقت کی حکمت اور دل میں ایمان کی روشنی جھلک رہی تھی۔ انہوں نے انشراح کے ننھے ہاتھوں کو تھام کر نرمی سے کہا:
’’میری پیاری بیٹی! رمضان کوئی عام مہمان نہیں ہے۔ یہ تو ایک ایسا مہمان ہے جو دل کے دروازے پر دستک دیتا ہے۔ اس کا استقبال صرف روشنیوں اور دسترخوان سے نہیں ہوتا بلکہ دل کی صفائی اور روح کی تیاری سے ہوتا ہے۔
انشراح حیران ہو گئی، ’’دل کی صفائی؟ وہ کیا ہوتی ہے؟‘‘
نانی امی نے ایک لمحے کے لیے آسمان کی طرف دیکھا، جیسے وہاں سے کوئی روشنی اپنے لفظوں میں اتار رہی ہوں۔
’’ہاں بیٹی، دل کی صفائی! جیسے ہم کسی خاص مہمان کے آنے سے پہلے اپنے گھر کے ہر کونے کو صاف کرتے ہیں، ویسے ہی ہمیں رمضان کے لیے اپنے دل کے کونے کونے کو بھی صاف کرنا چاہیے۔ دل میں جو حسد، بغض، غصہ، اور نفرت جمع ہو جاتی ہے، اسے معافی، محبت، اور صبر سے دھونا ہوتا ہے۔‘‘
نانی امی نے زمین سے ایک خشک پتہ اٹھایا اور انشراح کی ہتھیلی پر رکھ دیا۔’’دیکھو، یہ سوکھا پتہ اب بیکار ہو چکا ہے، نہ یہ سایہ دے سکتا ہے، نہ خوبصورتی۔ دل بھی ایسا ہی ہو جاتا ہے اگر ہم اسے برائیوں سے بھر دیں۔ لیکن اگر ہم دل کو نرم اور صاف رکھیں تو یہ محبت اور سکون بانٹنے والا ایک سایہ دار درخت بن جاتا ہے۔‘‘
انشراح کی آنکھوں میں ایک چمک سی آ گئی۔ اس نے حیرت اور خوشی کے ملے جلے جذبات کے ساتھ پوچھا:
’’تو نانی امی! رمضان کا استقبال کرنے کے لیے ہمیں سب سے پہلے اپنے دل کو صاف کرنا ہے؟‘‘
نانی امی نے نرمی سے سر ہلایا اور کہا:
’’ہاں بیٹی، دل کی صفائی سب سے اہم ہے۔ پھر اپنے دل کو دعا سے بھرنا ہے، قرآن کی تلاوت سے روشنی پھیلانی ہے، اور نیکیوں کے پھول کھلانے ہیں۔ یہی ہے رمضان کی سچی تیاری۔‘‘
انشراح نے آسمان کی طرف دیکھا۔ شام کی روشنیوں میں جیسے ایک نیا رنگ شامل ہو گیا تھا۔ اس نے دل کی گہرائیوں سے دعا کی:
’’یا اللہ! میرا دل بھی صاف اور روشن بنا دے، تاکہ میں تیرے رمضان کوخوش آمدید کہہ سکوں!‘‘
اس لمحے شام کی سنہری دھوپ اور انشراح کے معصوم چہرے پر ایک خوبصورت روشنی جھلک رہی تھی۔ شاید رمضان کی پہلی کرن اس کے دل میں اتر چکی تھی۔
٭ ٭ ٭


0 Comments