رات کا وقت تھا۔ آسمان پر چاند چمک رہا تھا اور صحن میں ٹھنڈی ہوائیں چل رہی تھیں۔ بچے دادی اماں کے گرد بیٹھے تھے۔ کسی کے ہاتھ میں کھجور تھی اور کوئی دودھ پی رہا تھا۔
”دادی اماں“! چھوٹے حمزہ نے کہا، ”آج ہمیں دس محرم کی کہانی سنائیے نا!“
دادی اماں نے تسبیح ایک طرف رکھی اور محبت بھرے لہجے میں بولیں:
”آج میں تمہیں ہمارے پیارے نبی کریم ﷺ کے لاڈلے نواسے حضرت امام حسینؓ کی سچی داستان سناؤں گی۔“
بچے خاموش ہو گئے۔
دادی اماں نے کہنا شروع کیا:
”حضرت امام حسینؓ ہمارے پیارے نبی ﷺ کے بہت محبوب نواسے تھے۔ نبی کریم ﷺ ان سے بے حد محبت فرماتے تھے۔ حضرت امام حسینؓ سچے، بہادر، صابر اور انصاف پسند تھے۔“
علی نے پوچھا ”دادی اماں! پھر ان سے جنگ کیوں ہوئی؟“
دادی اماں بولی ”اس وقت ایک ایسا حکمران تھا جو چاہتا تھا کہ لوگ اس کی ظالمانہ حکومت کو تسلیم کر لیں۔ وہ طاقت، دولت اور خوف کے ذریعے لوگوں پر اپنی حکومت مسلط کیے ہوئے تھا، لیکن حضرت امام حسینؓ ظلم اور ناانصافی کو قبول کرنے کے لیے تیار نہ تھے۔“
مریم نے پوچھا:”کیا حضرت امام حسینؓ بادشاہ بننا چاہتے تھے؟“
دادی اماں نے نرمی سے جواب دیا: ”نہیں بیٹی! وہ نہ دولت چاہتے تھے، نہ محل اور نہ تخت۔ وہ صرف یہ چاہتے تھے کہ حق اور سچائی کا چراغ روشن رہے اور لوگ ظلم کے آگے نہ جھکیں۔“
کربلا کا سفر
”پھر حضرت امام حسینؓ اپنے اہلِ خانہ اور ساتھیوں کے ساتھ کربلا پہنچے۔ ان کے ساتھ صرف بہتر (72) جانثار تھے۔“
احمد حیرت سے بولا: ”صرف بہتر افراد؟“
”ہاں!“ دادی اماں نے جواب دیا، ”جبکہ دوسری طرف ہزاروں سپاہی تھے، جن کے پاس گھوڑے، تلواریں اور بے شمار ہتھیار موجود تھے۔“
حمزہ نے پوچھا:”پھر حضرت امام حسینؓ ڈرے نہیں؟“
دادی اماں مسکرائیں اور بولیں:
”جو اللہ تعالیٰ پر بھروسا کرتا ہے، وہ حق کی راہ میں کبھی خوف زدہ نہیں ہوتا۔“
پیاس اور صبر
”گرمی بہت شدید تھی۔ کئی دنوں تک پانی بند کردیا گیا۔ بچے پیاس سے نڈھال تھے۔ ننھے معصوم بچے پانی مانگتے تھے، مگر اس کے باوجود حضرت امام حسینؓ نے باطل کے سامنے سر جھکانے سے انکار کر دیا۔“
بچوں کی آنکھیں نم ہو گئیں۔
عاشورہ کا دن
دادی اماں نے دھیمی آواز میں کہا:
”پھر دس محرم، یعنی یومِ عاشورہ کا دن آیا۔ حضرت امام حسینؓ کے جانثار ساتھی ایک ایک کر کے حق کی خاطر قربان ہوتے گئے۔ انہوں نے ظلم کے سامنے سر نہیں جھکایا۔ بالآخر وہ سب حق کی خاطر شہادت کے عظیم مرتبے پر فائز ہوئے، مگر حق اور سچائی کا پرچم ہمیشہ کے لیے بلند کر گئے۔“
علی جذبات سے بولا:”یعنی وہ ہارے نہیں؟“
دادی اماں نے محبت سے جواب دیا:
’’نہیں بیٹا! جو حق پر ثابت قدم رہے، وہ کبھی حقیقی معنوں میں شکست نہیں کھاتا۔ آج بھی دنیا حضرت امام حسینؓ کو محبت اور عقیدت سے یاد کرتی ہے، جبکہ ظلم اور ناانصافی ہمیشہ نفرت اور مذمت کا سبب بنتے ہیں۔‘‘
دادی اماں نے بچوں کے سروں پر شفقت سے ہاتھ پھیرا اور کہا:
’’بچو! ہمیشہ سچ کا ساتھ دینا، انصاف اور بھلائی کے راستے پر چلنا، اور ظلم و ناانصافی کے آگے کبھی نہ جھکنا۔‘‘
تمام بچے ایک ساتھ بول اٹھے:
”ہم ہمیشہ حق کا ساتھ دیں گے، چاہے کچھ بھی ہو!“
یہ سن کر بوڑھی دادی اماں کی آنکھوں میں خوشی اور اطمینان کی ایک دلکش چمک اُبھر آئی۔
٭ ٭ ٭

![Bachon Ka Safah [Yawm e Ashura]](https://haadiya.in/wp-content/uploads/2026/06/Bachon-Ka-Safah-Yawm-e-Ashura.jpg)
0 Comments