ہندوستان اس وقت ایک ایسے دور سے گزر رہا ہے جہاں تعلیم، جمہوریت اور شہری حقوق سے متعلق کئی بنیادی سوالات ایک ساتھ سر اٹھا رہے ہیں۔ ایک طرف پرچہ لیک کے خلاف ملک گیر طلبہ تحریک نے حکومت کو اپنے مؤقف پر نظرِ ثانی پر مجبور کیا، دوسری جانب اتر پردیش کے رام پورمیں محمد علی جوہر یونیورسٹی اپنے وجود کے تحفظ کی جنگ لڑ رہی ہے، جبکہ تیسری طرف اسپیشل انٹینسیو ریویژن (ایس آئی آر)کے نام پر ووٹر فہرستوں سے نام خارج کیے جانے کا تنازع جمہوری نظام کی شفافیت پر سوالات کھڑے کر رہا ہے۔ بظاہر یہ تین الگ الگ واقعات ہیں، لیکن ان کے درمیان ایک گہرا تعلق موجود ہے۔ یہ تعلق انصاف، مساوات، تعلیم اور شہری حقوق کے تحفظ سے ہے۔
پرچہ لیک کے معاملے نے لاکھوں نوجوانوں کے خواب چکنا چور کر دیے۔ برسوں کی محنت، والدین کی امیدیں اور طلبہ کا مستقبل چند بدعنوان عناصر کی وجہ سے داؤ پر لگ گئے۔ اسی لیےنیٹ پیپر لیک کے مسئلے پر دہلی کے ’’جنتر منتر ‘‘سے شروع ہونے والی طلبہ تحریک دیکھتے ہی دیکھتے ایک ملک گیر عوامی تحریک میں تبدیل ہوگئی۔ سونم وانگ چُک نے طویل بھوک ہڑتال کی، ابھیجیت دیپکے اور دیگر نوجوان رہنماؤں نے مسلسل احتجاج کیا، اپوزیشن جماعتوں نے اس تحریک کی حمایت کی، اور راہل گاندھی سمیت متعدد سیاسی رہنما بھی سڑکوں پر اتر آئے۔ پولیس کی سخت کارروائیوں، لاٹھی چارج اور گرفتاریوں کے باوجود طلبہ اپنے مطالبات پر ڈٹے رہے۔ بالآخر حکومت کو اپنے مؤقف میں تبدیلی لانا پڑی اورمرکزی وزیر تعلیم دھرمیندر پردھان نے اپنے عہدے سے استعفیٰ دے دیا۔
یہ منظر ہندوستان کے لیے کوئی نیا نہیں تھا۔۲۰۱۹ میں شہریت ترمیمی قانون (سی اے اے) کے خلاف ہونے والے احتجاجات کے دوران بھی ملک نے پولیس کارروائیوں اور طاقت کے استعمال کے مناظر دیکھے تھے۔ اس وقت بھی مظاہرین کے خلاف سخت اقدامات پر سوالات اٹھے تھے، اور آج طلبہ تحریک کے دوران بھی اسی نوعیت کے الزامات سامنے آئے ہیں۔ یہ صورتحال ایک اہم سوال کو جنم دیتی ہے کہ کیا جمہوری احتجاج کو سننے اور اس سے مکالمہ کرنے کے بجائے اسے طاقت کے ذریعے دبانے کا رجحان فروغ پا رہا ہے؟
اس تحریک کے دوران سوشیل میڈیا پر تیزی سے وائرل ہونے والی ایک ویڈیو نے بھی خاصی توجہ حاصل کی۔ نوجوان سماجی کارکن ابھیجیت دیپکےنے جذباتی انداز میں کہا کہ اگر ان کا نام ’’ابھیجیت‘‘کے بجائے ’’خالد‘‘ہوتا تو شاید آج کہانی کچھ اور ہوتی۔ یہ ایک فرد کی رائے ہوسکتی ہے، مگر اس نے ملک میں شناخت، مساوات اور شہری حقوق سے متعلق ایک اہم قومی بحث کو جنم دیا۔ اصل سوال کسی ایک شخص کا نہیں بلکہ اس احساس کا ہے جو معاشرے کے مختلف طبقات میں پروان چڑھ رہا ہے۔
اسی تحریک کے دوران ایک اور سوال بھی بار بار سامنے آیا۔دہلی کے جنتر منتر کی احتجاجی تحریک میں مختلف سیاسی جماعتیں، سماجی کارکن، دانشور، سونم وانگ چُک، ابھیجیت اور ہزاروں طلبہ شریک تھے۔ لیکن جب محمد علی جوہر یونیورسٹی کے وجود پر خطرات منڈلانے لگے تو اسی نوعیت کی ہمہ گیر اجتماعی آواز سنائی نہ دی۔
یو پی کے رامپور میں قائم محمد علی جوہر یونیورسٹی محض ایک تعلیمی ادارہ نہیں بلکہ تعلیم کے ذریعے سماجی ترقی کے ایک خواب کی تعبیر ہے۔ ہزاروں طلبہ یہاں زیرِ تعلیم ہیں۔ اگر اس سے متعلق قانونی تنازعات موجود ہیں تو ان کا فیصلہ عدالتوں اور قانونی ذرائع سے ہونا چاہیے، لیکن پورے تعلیمی ادارے کے وجود کو خطرات سے دوچار کرنا ایسا اقدام ہے جس کے اثرات آنے والی نسلوں تک محسوس کیے جا سکتے ہیں۔
یہ بنیادی سوال اب بھی اپنی جگہ قائم ہے کہ اگر امتحانی نظام میں بے ضابطگیوں کے خلاف پورا ملک متحد ہوسکتا ہے تو پھر ایک یونیورسٹی کے تحفظ کے لیے وہی حساسیت کیوں نظر نہیں آتی؟ کیا تعلیم کا حق صرف امتحانات تک محدود ہے، یا تعلیمی اداروں کا تحفظ بھی اتنا ہی اہم ہے؟ اگر حکومت کو کسی فرد یا سیاسی رہنما سے اختلاف ہے تو اس کا حل بھی آئین اور قانون کے دائرے میں تلاش کیا جانا چاہیے، لیکن تعلیمی اداروں کو سیاسی یا قانونی تنازعات کی نذر کرنا کسی بھی مہذب معاشرے کے لیے نیک شگون نہیں۔
اسی دوران عوامی اور سماجی حلقوں میں ایک اور معاملہ بھی زیرِ بحث رہا۔ رام مندر ٹرسٹ سے متعلق سامنے آنے والی مبینہ مالی بے ضابطگیوں اور چندے کے استعمال سے متعلق عائد کیے گئے الزامات پر اپوزیشن جماعتوں اور مختلف سماجی حلقوں نے شفاف تحقیقات کا مطالبہ کیا، لیکن ناقدین کے مطابق اس معاملے میں وہ سیاسی سنجیدگی دکھائی نہیں دی جو دیگر معاملات میں نظر آتی ہے۔ ان حلقوں کا مؤقف ہے کہ اگر احتساب واقعی ایک قومی اصول ہے تو اس کا اطلاق سب پر یکساں ہونا چاہیے۔ عوام کا اعتماد اسی وقت برقرار رہتا ہے جب قانون کا اطلاق اور احتساب کا معیار سب کے لیے برابر ہو۔
دوسری جانب ایس آئی آر کے نام پر ووٹر فہرستوں کی نظرِ ثانی کا عمل بھی سیاسی اور قانونی بحث کا مرکزِ نگاہ بنا ہوا ہے۔ الیکشن کمیشن کا مؤقف ہے کہ اس کا مقصد انتخابی فہرستوں کو درست، جامع اور شفاف بنانا ہے، لیکن مختلف سیاسی جماعتیں اور سماجی تنظیمیں اس عمل کی شفافیت پر سوالات اٹھارہی ہیں۔ سپریم کورٹ نے بھی اپنے مشاہدات میں واضح کیا ہے کہ کسی شہری کا نام ووٹر فہرست سے خارج کرنا معمولی معاملہ نہیں، بلکہ اس کے دور رس جمہوری اثرات مرتب ہوسکتے ہیں۔
آج بھی ایس آئی آر کا تنازع ختم نہیں ہوا۔عدالتوں میں سماعت جاری ہے، سیاسی جماعتیں اپنے اعتراضات اور تحفظات پیش کر رہی ہیں، جبکہ مختلف علاقوں سے ووٹروں کے نام خارج کیے جانے کی شکایات بھی سامنے آ رہی ہیں۔ یہ معاملہ اب محض ووٹر فہرستوں تک محدود نہیں رہا بلکہ جمہوری نمائندگی، انتخابی شفافیت اور عوامی اعتماد سے جڑا ایک اہم قومی مسئلہ بن چکا ہے۔
درحقیقت طلبہ تحریک، محمد علی جوہر یونیورسٹی اور ایس آئی آر تین الگ الگ کہانیاں نہیں ہیں بلکہ ایک ہی قومی داستان کے مختلف ابواب ہیں۔ ایک باب نوجوانوں کے مستقبل سے متعلق ہے، دوسرا تعلیم کے بنیادی حق سے، اور تیسرا جمہوری نمائندگی کے تحفظ سے۔
کسی بھی جمہوریت کی اصل طاقت اس کے تعلیمی ادارے، بااختیار شہری اور آزاد، منصفانہ اور شفاف انتخابی نظام ہوتے ہیں۔ جب طلبہ اپنے مستقبل کے لیے سڑکوں پر ہوں، ایک یونیورسٹی اپنے وجود کے تحفظ کے لیے جدوجہد کر رہی ہو، اور ووٹر اپنے حقِ رائے دہی کے بارے میں فکرمند ہوں تو یہ محض خبریں نہیں رہتیں بلکہ ایک بڑے قومی سوال کی شکل اختیار کر لیتی ہیں۔
وقت کا تقاضا ہے کہ سیاسی وابستگیوں اور نظریاتی اختلافات سے بالاتر ہوکر اصولوں کی بنیاد پر مؤقف اختیار کیا جائے۔ اگر طلبہ کے مستقبل کے لیے آواز اٹھائی جا سکتی ہے تو محمد علی جوہر یونیورسٹی جیسے تعلیمی اداروں کے تحفظ کے لیے بھی آواز بلند ہونی چاہیے، اور اگر جمہوریت عزیز ہے تو ہر شہری کے حقِ رائے دہی کے تحفظ کو بھی یقینی بنایا جانا چاہیے۔
قوموں کی تعمیر صرف سڑکوں، عمارتوں اور نعروں سے نہیں ہوتی بلکہ تعلیم، انصاف، احتساب اور عوام کے اعتماد سے ہوتی ہے۔ جب یہ ستون کمزور پڑنے لگیں تو خطرہ صرف اداروں تک محدود نہیں رہتا بلکہ پوری جمہوری ساخت کو اپنی لپیٹ میں لے لیتا ہے۔
٭ ٭ ٭


0 Comments