حقوق ہم سایہ دنیوی نعمت، اخروی نجات

اللہ تعالیٰ نے انسان کو بے شمار نعمتوں سے نوازا ہے، ان میں ایک بڑی نعمت اچھا پڑوسی بھی ہے۔ پڑوسی سے مراد وہ شخص ہے جو انسان کے قریب رہتا ہے، اس کی زندگی کے حالات سے واقف ہوتا ہے۔ روزمرہ کے معاملات میں سب سے پہلے اس سے تعلق کا مرحلہ آتا ہے۔ دینِ اسلام کا حسن یہ ہے کہ اس نے صرف حقوقُ اللہ ہی نہیں بلکہ حقوقُ العباد کے بارے میں بھی مکمل رہنمائی فراہم کی ہے۔ اگر مسلمان ان ہدایات پر عمل کریں تو ایک پرامن، خوشگوار اور مضبوط معاشرہ وجود میں آسکتا ہے۔ انہی حقوق العباد میں ایک اہم حق پڑوسیوں کا حق ہے۔ قرآنِ کریم میں ارشادِ باری تعالیٰ ہے:
وَ الۡجَارِ ذِی الۡقُرۡبٰی وَ الۡجَارِ الۡجُنُبِ (النساء: ۳۶)
’’قریب کے پڑوسی اور دور کے پڑوسی کے ساتھ بھی بھلائی کرو۔‘‘
مفسرین نے فرمایا ہے کہ قریب کے پڑوسی سے مراد وہ ہے جس کا گھر اپنے گھر سے ملا ہوا ہو اور دور کے پڑوسی سے مراد وہ ہے جو محلے میں تو رہتا ہو مگر فاصلہ کچھ زیادہ ہو۔ اسی طرح جو پڑوسی رشتہ دار بھی ہو، وہ قریب کا ہمسایہ ہے اور جو صرف پڑوسی ہو، وہ دور کا ہمسایہ شمار ہوگا۔

پڑوسی کا حق

اسلام نے پڑوسی کے ساتھ حسنِ سلوک کو ایمان کا حصہ قرار دیا ہے۔ حضرت ملا علی قاریؒ نے ایک حدیث کے حوالے سے فرمایا کہ رسولِ اکرم ﷺ نے فرمایا: ’’کیا تم جانتے ہو کہ پڑوسی کا تم پر کیا حق ہے؟ اگر وہ مدد مانگے تو مدد کرو، قرض چاہے تو دو۔ اگر محتاج ہو تو اس کی حاجت پوری کرو۔ بیمار ہو تو عیادت کرو۔ فوت ہو جائے تو جنازے میں شریک ہو۔ خوشی حاصل ہو تو مبارک باد دو۔ مصیبت آئے تو تعزیت کرو۔ بلا اجازت اس کے مکان سے اونچا مکان نہ بناؤ کہ اس کی ہوا رُک جائے۔ اگر پھل خریدو تو کچھ اسے بھی دو، اگر نہ دے سکو تو اسے پوشیدہ طور پر لاؤ اور اپنے بچوں کو باہر مت جانے دو کہ پڑوسی کے بچوں کو رنج ہو۔ اپنی ہانڈی کے دھوئیں سے اسے تکلیف نہ پہنچاؤ مگر کچھ نہ کچھ اسے بھی بھیج دو۔ آپ ﷺ نے آخر میں فرمایا: اس ذات کی قسم جس کے ہاتھ میں میری جان ہے، پڑوسی کا حق وہی شخص ادا کر سکتا ہے جس پر اللہ رحم فرمائے۔‘‘ (مرقاۃ المفاتیح: ۸؍۶۹)

لذت پر الفت و محبت کو ترجیح

اسلام ہمیں یہ سکھاتا ہے کہ پڑوسی کے ساتھ حسنِ سلوک صرف مال و دولت سے نہیں بلکہ دل و اخلاق سے بھی ہوتا ہے۔ حضرت ابوذرؓ سے روایت ہے کہ رسولِ اکرم ﷺ نے فرمایا: ’’اے ابوذر! جب شوربہ پکاؤ تو اس کا پانی زیادہ کر دو اور اپنے پڑوسیوں کا خیال رکھو۔‘‘ (مسلم: ۲۶۲۵)
مفسرِ حکیم الامت مفتی احمد یار خان نعیمیؒ فرماتے ہیں کہ اس حدیث سے معلوم ہوا کہ معمولی کھانا بھی پڑوسیوں کو بھیجتے رہنا چاہیے، چاہے وہ شوربہ ہی کیوں نہ ہو۔ مقصد لذت نہیں بلکہ محبت ہے۔ کیوں کہ جب شوربے میں صرف پانی بڑھایا جائے تو ذائقہ کم ہوتا ہے لیکن محبت بڑھتی ہے اور یہی اسلام کا مقصود ہے۔ (مراۃ المناجیح: ۳؍۱۲۱)

پڑوسی کی طرف سے پہنچنے والی مصیبت پر صبر کرنا

پڑوسی کے حقوق صرف یہ نہیں ہیں کہ اسے تکلیف نہ دی جائے، بلکہ اس کی طرف سے پہنچنے والی تکلیفوں پر صبر کرنا بھی پڑوس کے حق میں شامل ہے۔ امام محمد غزالیؒ فرماتے ہیں: ’’حقِ پڑوسی صرف یہ نہیں کہ اسے اذیت سے بچایا جائے بلکہ یہ بھی کہ اس کی ایذا رسانی پر صبر کیا جائے۔‘‘
(احیاء العلوم: ۲؍۲۶۹)
نبی کریم ﷺ نے فرمایا: ’’اللہ تعالیٰ ان لوگوں سے محبت فرماتا ہے جو برے پڑوسی کی ایذا پر صبر کرتے ہیں، یہاں تک کہ اللہ اس سے اس کی زندگی یا موت کے ذریعے کفایت فرمائے۔‘‘

پڑوسی کو دینی تعلیم سکھانا

اسلام نے ہمیں یہ بھی سکھایا ہے کہ جہاں پڑوسی کی دنیوی ضرورتوں کا خیال رکھنا ضروری ہے، وہیں اس کی دینی اور اخلاقی تربیت کا اہتمام کرنا بھی لازم ہے۔ ایک حدیث میں نبی کریم ﷺ نے فرمایا کہ کچھ لوگ اپنے پڑوسیوں کو دین نہیں سکھاتے، انھیں برائیوں سے نہیں روکتے اور دین نہ سیکھنے کے انجام سے آگاہ نہیں کرتے اور کچھ پڑوسی ایسے ہیں جو دین سیکھنے کی کوشش ہی نہیں کرتے۔ آپ ﷺ نے فرمایا: ’’خدا کی قسم! لوگ اپنے پڑوسیوں کو دین سکھائیں، ان کی رہنمائی کریں یا ان سے دین سیکھیں اور عمل کریں، ورنہ میں ان پر جلد عذاب نازل کروں گا۔‘‘ (طبرانی)
اس حدیث میں واضح پیغام دیا گیا ہے کہ پڑوسی کا حق صرف مادی تعاون نہیں بلکہ علمی و اخلاقی تعاون بھی ہے۔ پڑوسیوں کو دینی فہم دینا، ان کی اصلاح کرنا اور انھیں خیر کی طرف بلانا بھی اسلامی فریضہ ہے۔

پڑوسی کی خبر گیری

اسی طرح پڑوسی کی خبرگیری بھی ایمان کا مظہر ہے۔ اگر کوئی کمزور، ضعیف یا بیمار ہے، اگر کسی کے گھر میں پریشانی یا تنازع ہے، تو اس کی مدد کرنا اسلامی اخوت کا تقاضا ہے۔ سیرتِ صحابہؓ میں ایسے بے شمار واقعات ملتے ہیں۔ حضرت عمر فاروقؓ فرمایا کرتے تھے کہ ’’میں نے جب بھی نیکی میں سبقت چاہی تو دیکھا کہ ابوبکرؓ مجھ سے آگے ہیں۔‘‘ ایک موقع پر رات کے وقت آپؓ ایک نابینا بوڑھی عورت کے گھر پہنچے تاکہ اس کے کام کر دیں، لیکن دیکھا کہ تمام کام پہلے ہی ہو چکے ہیں۔ آخر کار معلوم ہوا کہ وہ خلیفۂ وقت حضرت ابوبکر صدیقؓ ہیں جو راتوں کو چپکے سے اس ضعیف عورت کی خدمت کرتے تھے۔ یہ واقعہ صحابہ کی زندگی کا نہیں بلکہ اسلام کے عملی اخلاق کا مظہر ہے کہ پڑوسی کی خدمت دراصل اللہ کی رضا کا ذریعہ ہے۔
(کتاب الفضائل، باب فضائل الصحابہ)
ان واقعات سے ہمیں یہ سبق ملتا ہے کہ پڑوسی کا حق ایک بڑی اہم ذمہ داری ہے۔ ہمیں اپنے محلے، گلی اور بستی میں ایسے افراد پر نظر رکھنی چاہیے جو مدد کے محتاج ہوں۔ کوئی بیمار ہو، اکیلا ہو، یا کسی تکلیف میں مبتلا ہو تو مسلمان کی شان ہے کہ وہ ان کی خبر گیری کرے، ان کی مدد کرے اور ان کے لیے خیر خواہی کے جذبے سے سرشار رہے۔
اسلام نے ہمیں یہ تعلیم دی ہے کہ پڑوسی کی خدمت دنیوی نعمت بھی ہے اور اخروی نجات کا ذریعہ بھی۔ جو اپنے پڑوسی کے ساتھ بھلائی کرتا ہے، وہ دراصل اپنے رب کی خوشنودی حاصل کرتا ہے۔ نبی کریم ﷺ نے فرمایا: ’’جبرائیل مجھے پڑوسی کے حق کی اتنی تاکید کرتے رہے کہ میں نے گمان کیا کہ شاید اسے میراث میں بھی شریک کر دیا جائے گا۔‘‘ (بخاری و مسلم)
اللہ تعالیٰ ہمیں توفیق دے کہ ہم اپنے پڑوسیوں کے ساتھ حسنِ سلوک کریں، ان کی تکلیفوں میں شریک ہوں، ان کے دکھ درد کو اپنا سمجھیں، ان کی دینی و اخلاقی تربیت کا خیال رکھیں اور ایک ایسا معاشرہ قائم کریں جہاں محبت، خیر خواہی، اخوت اور عدل کی فضا قائم ہو۔ یہی اسلام کا پیغام ہے اور یہی نجات کا راستہ ہے۔ اللہ تعالیٰ ہم سب کو پڑوسیوں کا حق ادا کرنے کی توفیق عطا فرمائے، آمین۔

٭ ٭ ٭

Comments From Facebook
اگر پسند آیا تو لائک ضرور کریں:

2 Comments

  1. فاطمہ کوثر حمیروی ۔ آندھراپردیش

    السلام علیکم ورحمتہ اللہ وبرکاتہ
    الحمدللہ مضمون سے بہت ہی فائدہ ہوا۔ اللہ تعالیٰ ہم سب کو پڑوسیوں کے حقوق ادا کرنے کی توفیق عطاء فرمائے آمِین

    Reply
    • زاہدہ بیگم

      الحمدللہ ،بہت ہی بہترین مضمون ہے،اللہ تعالی ہمیں پڑوسیوں کے حقوق ادا کرنے کی توفیق عطا فرمائے آمین یارب العالمین ۔

      Reply

Submit a Comment

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

نومبر ۲۰۲٥