عدّت کے احکام و مسائل

سوال:
میری نند بیوہ ہوگئی ہیں۔ عدّت کے دوران انھیں گھر کے اندرونی کمرے میں رکھا گیا ہے۔ کسی سے ملنے جلنے نہیں دیا جاتا۔ گھر کے تمام مردوں سے ان کا پردہ کرایا جارہا ہے۔ وہ ہر وقت روتی رہتی ہیں۔ کھانا بھی ان کو الگ تھلگ دیا جارہا ہے۔ اس صورتِ حال میں ان کی صحت خراب ہونے کا اندیشہ ہے۔ میں بہت پریشان ہوں۔ میری سمجھ میں نہیں آرہا ہے کہ انھیں نارمل رکھنے کے لیے کیا کروں؟ اس پس منظر میں میرے چند سوالات ہیں:
(1) عدّت کی حکمت کیا ہے؟ اس کا حکم کیوں دیا گیا ہے؟
(2) عدّتِ طلاق اور عدّتِ وفات میں فرق کیوں ہے؟ عدّتِ طلاق کے مقابلے میں عدّتِ وفات کی مدت کیوں زیادہ ہے؟
(3) عدّت میں عورت کو الگ تھلگ کیوں رکھا جاتا ہے؟ کیا دورانِ عدّت خونی رشتے داروں سے بھی عورت کو پردہ کرنا چاہیے؟
(4) اگر عورت ملازمت پیشہ ہو تو کیا وہ دورانِ عدّت کام پر جاسکتی ہے؟
(5) دورانِ عدّت اگر عورت کے کسی عزیز کا انتقال ہوجائے یا وہ سخت بیمار ہو یا اس کی کسی قریبی عزیزہ کا نکاح ہو تو کیا عورت تعزیت یا تہنیت کے لیے گھر سے باہر جاسکتی ہے؟
براہِ کرم اس موضوع پر تفصیل سے اظہارِ خیال فرمائیں تاکہ تمام غلط فہمیاں دور ہوجائیں۔

جواب:

بیوہ عورت کو عدّت کے شرعی احکام کی پابندی ضرور کرنی ہے، لیکن اسے گھر کے ایک کمرے میں بند کردینا، ہر شخص سے ملنے سے روک دینا، محرم رشتے داروں سے بھی پردہ کرانا یا اسے اس طرح تنہا کردینا کہ اس کی صحت متاثر ہونے لگے، یہ عدّت کے مطلوبہ شرعی مزاج سے زائد پابندیاں ہیں۔ عدّت عورت کو قید کرنے یا معاشرتی زندگی سے کاٹ دینے کا نام نہیں ہے۔ عدّت ایک شرعی مدت ہے، جس کے مخصوص احکام ہیں۔ ان احکام کی پابندی ضروری ہے، لیکن اس کے ساتھ عورت کی جسمانی و ذہنی صحت، اس کی ضروریات اور اس کے انسانی وقار کا بھی لحاظ رکھا جائے گا۔ ذیل میں عدّت کے ضروری احکام و مسائل بیان کیے جارہے ہیں:
(1)عدّت کا بنیادی حکم قرآن مجید میں ہے:

وَالَّذِينَ يُتَوَفَّوْنَ مِنْكُمْ وَيَذَرُونَ أَزْوَاجًا يَتَرَبَّصْنَ بِأَنْفُسِهِنَّ أَرْبَعَةَ أَشْهُرٍ وَعَشْرًا

(البقرۃ:234)
’’اور تم میں سے جو لوگ وفات پائیں اور بیویاں چھوڑ جائیں تو وہ عورتیں اپنے آپ کو چار ماہ دس دن روکے رکھیں۔‘‘
عدّت کی متعدد حکمتیں بیان کی گئی ہیں:
اولاً: نکاح کے سابق رشتے کا شرعی اختتام اور اس کے احترام کا اظہار۔
شوہر کی وفات کے بعد عورت فوراً نئے نکاح کی طرف منتقل نہیں ہوتی، بلکہ ایک متعین مدت انتظار کرتی ہے۔ یہ سابق ازدواجی تعلق کی حرمت و وقار کا اظہار بھی ہے۔
ثانیاً: حمل کے امکان کی وضاحت۔
خاص طور پر وفات یا طلاق کے بعد رحم کی براءت معلوم ہونا نکاح اور نسب کے احکام کے اعتبار سے اہم ہے۔ اگرچہ آج طبی ذرائع سے حمل کے بارے میں بہت سی معلومات حاصل کی جاسکتی ہیں، لیکن عدّت کا شرعی حکم صرف اسی ایک حکمت پر موقوف نہیں ہے۔
ثالثاً: سوگ اور اظہارِ وفاداری۔
بیوہ کو عدّتِ وفات میں ’اِحداد‘ یعنی زیب و زینت ترک کرنے کا حکم ہے۔ یہ شوہر کی وفات پر ایک شرعی سوگ ہے۔
لیکن یہاں ایک نہایت اہم فرق سمجھنا چاہیے۔ سوگ کا مطلب یہ نہیں کہ عورت کو قید کردیا جائے یا اسے ہر قسم کی معاشرتی زندگی سے محروم کردیا جائے۔ رسول اللہ ﷺ نے جاہلیت کے طرزِ سوگ کی اصلاح فرمائی اور عدّت کو ایک متعین شرعی مدت کے ساتھ وابستہ کیا۔
(2) طلاق کی صورت میں قرآن مجید میں ہے:

وَالْمُطَلَّقَاتُ يَتَرَبَّصْنَ بِأَنْفُسِهِنَّ ثَلَاثَةَ قُرُوءٍ

(البقرۃ :228)
جب کہ شوہر کی وفات کی صورت میں:

 أَرْبَعَةَ أَشْهُرٍ وَعَشْرًا

 (البقرۃ: 234)
یعنی عام حالات میں طلاق یافتہ عورت کی عدّت تین حیض (حنفی فقہ کے مطابق) اور بیوہ عورت کی عدّت چار ماہ دس دن ہے۔ اور اگر عورت حاملہ ہو تو طلاق یا وفات دونوں صورتوں میں اس کی عدّت وضعِ حمل تک ہے

: وَأُولَاتُ الْأَحْمَالِ أَجَلُهُنَّ أَنْ يَضَعْنَ حَمْلَهُنَّ

 (الطلاق: 4)
پھر وفات کی عدّت زیادہ کیوں؟ اس کی مکمل علّت اللہ تعالیٰ نے صراحتاً بیان نہیں فرمائی، اس لیے ہمیں حکمتوں کا ذکر کرتے ہوئے یہ احتیاط کرنی چاہیے کہ انھیں قطعی علّت قرار نہ دیں۔ وفات میں صرف نکاح کے خاتمے کا معاملہ نہیں، بلکہ شوہر کی موت، ازدواجی تعلق کے قطعی اختتام اور سوگ کا پہلو بھی موجود ہے۔ اسی لیے شریعت نے وفات کی صورت میں عدّت کی مخصوص مدت مقرر کی ہے۔
(3) عدّت کا مطلب یہ نہیں کہ عورت کو ایک کمرے میں بند کردیا جائے اور وہ کسی سے ملاقات نہ کرے۔ قرآن مجید میں مطلقہ عورت کے بارے میں فرمایا گیا ہے:

لَا تُخْرِجُوهُنَّ مِنْ بُيُوتِهِنَّ وَلَا يَخْرُجْنَ

(الطلاق:1)
’’انھیں ان کے گھروں سے نہ نکالو اور وہ خود بھی نہ نکلیں۔‘‘
یہ آیت خاص طور پر عدّتِ طلاق کے بارے میں ہے، لیکن اس سے یہ بات واضح ہوتی ہے کہ عدّت کا بنیادی تصور رہائش اور انتظار کی شرعی مدت ہے، نہ کہ قیدِ تنہائی۔
احادیث سے بھی معلوم ہوتا ہے کہ عدّت گزارنے والی عورتیں اپنی ضروریات کے لیے باہر نکل سکتی تھیں۔
حضرت جابرؓ کی خالہ کو طلاق ہوگئی تھی۔ وہ اپنے کھجور کے باغ میں کام کرنے کے لیے جانا چاہتی تھیں۔ خان دان کے ایک شخص نے انھیں باہر جانے سے منع کردیا۔ وہ نبی ﷺ کی خدمت میں حاضر ہوئیں اور مسئلہ دریافت کیا۔ آپ ﷺ نے فرمایا:

بَلَى، فَجُدِّي نَخْلَكِ، فَإِنَّكِ عَسَى أَنْ تَصَدَّقِيَ أَوْ تَفْعَلِيَ مَعْرُوفًا

(مسلم: 1483)
’’کیوں نہیں! اپنے باغ میں درختوں سے کھجور اتار سکتی ہو۔ ممکن ہے تم صدقہ کرو یا کوئی نیک کام کرو۔‘‘
اس حدیث سے معلوم ہوتا ہے کہ عدّت گزارنے والی عورت پر مطلقاً گھر سے باہر نکلنے کی پابندی نہیں۔ بلکہ وہ وقتِ ضرورت کسی کام کے لیے باہر جاسکتی ہے۔
(4) عدّت کی وجہ سے کسی غیر محرم کا محرم بن جانا یا محرم کا غیر محرم بن جانا لازم نہیں آتا۔ مثلاً اگر عورت کا باپ، بھائی، بیٹا، چچا، ماموں، بھتیجا، بھانجا یا اور کوئی محرم ہے تو عدّت کی وجہ سے اس سے پردہ فرض نہیں ہوجاتا۔ قرآن مجید نے جن محرم رشتے داروں کے سامنے عورت کو حجابِ شرعی کے عمومی حکم سے مستثنیٰ کیا ہے، ان میں باپ، بیٹے، بھائی، بھتیجے اور بھانجے وغیرہ کا ذکر ہے:

وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ … أَوْ إِخْوَانِهِنَّ … 

 (النور: 31)
لہٰذا عدّت کے دوران بھی عورت اپنے محرم رشتے داروں سے معمول کے مطابق مل سکتی ہے۔ البتہ گھر کے جو مرد نامحرم ہیں، ان کے بارے میں عام شرعی پردے کے احکام بہ دستور رہیں گے۔ مثال کے طور پر دیور، جیٹھ، شوہر کے کزن، بہنوئی وغیرہ، ان سے پردہ عدّت سے پہلے بھی تھا اور عدّت کے دوران بھی ہے۔ لہٰذا یہ کہنا کہ چوں کہ عورت عدّت میں ہے، اس لیے گھر کے ہر مرد سے پردہ کرے، درست نہیں ہے۔
(5) جہاں تک یہ سوال ہے کہ کیا عدّت میں عورت ملازمت پر جاسکتی ہے؟ اس مسئلے میں کچھ تفصیل ہے۔ عدّتِ وفات گزارنے والی عورت کا بلا ضرورت گھر سے باہر نکلنا مناسب نہیں، لیکن یہ کہنا کہ وہ کسی صورت گھر سے باہر نہیں جاسکتی، یہ بھی درست نہیں۔
اگر عورت ملازمت پیشہ ہے اور اس کی ملازمت چھوڑنے سے اس کی ضروری آمدنی بند ہوجائے اور اس کے یا اس کے بچوں کے اخراجات متاثر ہوں تو ضرورت کے پیشِ نظر فقہی احکام کی رعایت کے ساتھ باہر جانے کی گنجائش ہوسکتی ہے۔ حضرت جابرؓ کی خالہ والی حدیث اس بات کی اصل فراہم کرتی ہے کہ عدّت گزارنے والی عورت ضرورت کے کام کے لیے باہر نکل سکتی ہے۔ البتہ جہاں ممکن ہو وہ دن کے وقت جائے اور کام مکمل کرکے واپس آجائے۔ غیر ضروری اختلاط سے بچے۔ زیب و زینت اور خوش بو وغیرہ کے استعمال سے اجتناب کرے۔ عدّت کی رہائش کو اپنا اصل مقام بنائے۔ اس لیے ملازمت کرنے والی بیوہ کو محض عدّت کی وجہ سے لازماً ملازمت سے فارغ کردینا ضروری نہیں۔
(6) اگر کسی عزیز کا انتقال ہوجائے تو کیا عورت تعزیت کے لیے جاسکتی ہے؟ اس مسئلے میں دو چیزوں کے درمیان فرق کرنا چاہیے:
عدّتِ وفات کے دوران عورت کا خود کسی دوسرے شخص کی وفات پر تعزیت کے لیے جانا، یہ ضرورت اور حالات کے مطابق دیکھا جائے گا۔ اگر محض رسمی تعزیت ہے اور گھر پر تعزیت کرنا ممکن ہے تو گھر سے نکلنے کی ضرورت نہیں۔ لیکن اگر کوئی حقیقی ضرورت یا شدید تعلق کا معاملہ ہو تو گنجائش ہوسکتی ہے۔
(7) اگر کسی قریبی عزیز کی شدید بیماری ہو اور اس کی عیادت یا تیمارداری کی واقعی ضرورت ہو یا گھر میں اس کی دیکھ بھال کرنے والا کوئی نہ ہو تو ضرورت کے تحت عورت کے گھر سے نکلنے کی گنجائش ہوگی۔
شریعت کا مزاج انسان کو غیر ضروری مشقت میں ڈالنا نہیں ہے۔
(8) نکاح میں شرکت عموماً ضرورت نہیں ہوتی۔ لہٰذا اگر کسی قریبی عزیزہ کا نکاح ہو تو محض شرکت اور خوشی میں شریک ہونے کے لیے عدّت کے دوران باہر نکلنے سے احتراز کرنا چاہیے۔ لیکن اگر ایسا غیر معمولی معاملہ ہو، جس میں اس کی موجودگی واقعی ضروری ہو تو الگ حکم ہوسکتا ہے۔
عدّتِ وفات میں عورت کو زیب و زینت، خوش بو، زیورات اور بناؤ سنگھار سے اجتناب کرنا ہوتا ہے۔ لہٰذا نکاح میں شرکت کی صورت میں بھی اسے شادی کی تقریب کے مطابق بناؤ سنگھار کرنے کی اجازت نہیں ہوگی۔
(9) عدّت گزارنے والی عورت اپنی ماں، بہن، بیٹی، بھائی اور باپ سے مل سکتی ہے۔ اپنی سہیلیوں اور دوسری عورتوں سے مل سکتی ہے۔ گھر میں آنے والی خواتین سے بات چیت کرسکتی ہے۔ اپنے محرم رشتے داروں سے ملاقات کرسکتی ہے۔ اس کے لیے ضروری نہیں کہ وہ چوبیس گھنٹے ایک کمرے میں تنہا بیٹھی رہے۔ البتہ نامحرم مردوں سے شرعی پردہ برقرار رہے گا جیسا کہ عام حالات میں ہوتا ہے۔
(10) آپ نے اپنی نند کے بارے میں جو تفصیل لکھی ہے کہ وہ ہر وقت روتی رہتی ہیں، الگ کمرے میں رہتی ہیں، کسی سے مل نہیں سکتیں، کھانا بھی انھیں الگ دیا جاتا ہے اور تنہائی کی وجہ سے ان کی صحت خراب ہونے کا اندیشہ ہے تو یہاں گھر والوں کو بہت احتیاط کرنی چاہیے۔ شوہر کی وفات یقیناً بہت بڑا صدمہ ہے۔ غم کے اظہار پر کوئی پابندی نہیں، لیکن غم کو اس طرح بڑھا دینا کہ عورت جسمانی یا ذہنی طور پر ٹوٹنے لگے، شریعت کا مقصد نہیں۔ آپ ان کے ساتھ بیٹھیں، ان سے بات کریں، انھیں قرآن پڑھ کر سنائیں، ان کے ساتھ دعا کریں، ان کے پسندیدہ رشتے داروں اور خواتین کو ان سے ملنے دیں، مناسب کھانا دیں، کچھ دیر گھر کے صحن یا چھت وغیرہ پر بیٹھنے دیں اور انھیں بالکل تنہا نہ چھوڑیں۔

٭ ٭ ٭

Comments From Facebook
اگر پسند آیا تو لائک ضرور کریں:

0 Comments

Submit a Comment

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے