کہاں وہ ذات عالی مرتبت،نغمہ کجا میرا
ہوا آباد جن کے دم قدم سے میکدہ میرا

غلام مصطفیٰ ہونے کا مجھ کو شرف حاصل ہے
یہ کہدوں گا بروز حشر پوچھے گا خدا میرا

تلاطم خیز موجوں میں پھنسی ہے زیست کی کشتی
مجھے غم کیوں ستائے،ناخدا ہے مصطفیٰ میرا

گھٹا جاتا تھا دم میرا جہالت کے اندھیرے میں
نبوت کی ضیا باری سے دل روشن ہوا میرا

مجھے بھی صفہ نبوی کا علمی فیض پہنچا ہے
کہ شاگردان احمد سے جڑا ہے سلسلہ میرا

تصور سے فزوں تر ہے مقام و مرتبہ ان کا
مسلم ہے عدوئے مصطفیٰ کو مدعا میرا

مری تقدیر پر حیدر فرشتے رشک کرتے ہیں
محمد کی ثنا کرنا ہوا ہے مشغلہ میرا