ان کے انتقال کی غمناک خبر سن کر ہم بہت دور سے مرحومہ کے گھر آئے ہیں،لیکن گھر میں داخل نہیں ہو سکے ہیں۔گھر کے باہر بڑا سا صحن بھی خواتین سے کھچاکھچ بھرا ہے۔جبکہ بہت سارے مرد حضرات داخلی دروازے کے باہر دونوں جانب کھڑے تھے۔
سمجھ میں نہیں آرہا تھا ہم کیا کریں؟اندر سے آوازیں آرہی تھیں” باہر نکلیں !اندر جگہ نہیں ہے۔“
اسی بیچ کسی نے رہنمائی کی،گھر کے بالکل سامنے مدرسہ جامعۃ الصالحات چلیے۔ہم پلٹ کر وہاں سے مدرسہ میں داخل ہوئے۔دیکھا کلاسز میں بہت سی خواتین بیٹھی ہیں۔
ہم بھی خاموشی سے وہاں بیٹھ گئے۔جائزہ لینے لگے،بہت سی خواتین ہمارے لیے اجنبی تھیں۔
آہستہ آہستہ تعارف ہوا،کچھ پڑوسی خواتین تھیں،کچھ تحریکی خواتین ۔ چہروں سے صاف ظاہر تھا،سب دکھی تھیں، مغموم تھیں،محرومہ کی تعریف کر رہی تھیں، دعائیہ کلمات کہہ رہی تھیں۔
ایک خاتون نے جب دوسری قریبی خاتون سے پوچھا” آپ مرحومہ کی کون ہیں؟“
جواب تھا ” میں ان کی پڑوسن ہوں۔ سب کچھ جانتی ہوں۔“
ایسی عورت میں نے زندگی میں نہیں دیکھی۔ مدرسہ کی گھڑکی سے اشارہ کرکے بتایا کہ صبح صبح گھر کے صحن کے ساتھ یہ راستہ بھی جھاڑتی تھیں۔دیکھ کر لگتا ہی نہیں تھا کہ ٹیچر ہیں۔ ان پڑوسن صاحبہ نے پوچھا بھی تھا” آپ کی جوائنٹ فیملی ہے،صحن مشترکہ ہے،دوسری خواتین بھی صفائی کرسکتی ہیں،آپ کیوں کرتی ہیں؟آپ تو ٹیچر ہیں؟“
جواب تھا: ”ٹیچر ہوں ،اسی لیے تو کرتی ہوں۔بعد میں سارے کام تو وہ خواتین کرتی ہیں۔میں اسکول میں ہوتی ہوں۔“
میں دل سے مان گئی۔ پڑوسی کی گواہی،اب کیا چاہیے مرحومہ کو!
میرا بھی پہلا تاثر یہی تھا مرحومہ کے بارے میں۔ دیکھ کر تو لگتا ہی نہیں تھا کہ ٹیچر ہیں۔عام طور سے ٹیچر خواتین ان کےجدید برقعے، پرس اور سینڈل سے پہچانی جاتی ہیں۔ لیکن یہ مختلف تحریکی ٹیچر تھیں۔بہت سادہ،اخلاص سے بھر پور۔
میری ان سے بہت کم گنی چنی ملاقاتیں تھیں۔میرے بچے چونکہ اس وقت چھوٹے تھے،میں بہت کم اجتماعات میں شریک ہوتی تھی۔ اور شریک بھی ہوتی تو وقفہ میں بچوں کی ضروریات میں مصروف رہتی۔میں نے ان کو وقفہ میں جب بھی دیکھا،دستر خوان بچھاتے اٹھاتے۔تیزی سے مشخابیں لاتے لے جاتے دیکھا۔ وقفہ میں دستر خوان بچھا کر کھانے کے لیے چلیے کی ایسی آواز لگاتی تھیں مانو یہ ان کے گھر کا پروگرام ہے۔ کوئی مہمان چھوٹ نہ جائے،بھوکا نہ رہ جائے۔
جماعت سے میری وابستگی کا ایک سبب نورجہاں باجی کی اخلاص سے پر شخصیت بھی تھی۔ ان کے انتقال پرملال پرلوگوں کے کثیر مجمعے کو دیکھ کراوران کے احساسات جان کر میں نور جہاں باجی کی شخصیت سے متاثر ہوئے بغیر رہ نہیںسکی ،اور اس احساس کے ساتھ لوٹنا پڑا کہ کاش! میں نے ان سے دوستی کی ہوتی، ان کی صحبت میں رہی ہوتی، انتقال کے بعدبھی لوگوں کے دلوں میں جگہ بناتی گئیں۔
مغموم دل، نم ناک آنکھوں اور دعائیہ کلمات کے ساتھ ہم لوگ رخصت ہوگئے۔

محمد عبد الجلیل صاحب ( سابق امیر مقامی ناندیڑ )